روسیه: در صورت بروز تنش در مرز تاجیکستان و افغانستان «قاطعانه عمل می‌کنیم»
دولت روسیه می‌گوید تحولات مرز میان تاجیکستان و افغانستان را زیر نظر دارد و در صورت لزوم، آماده «حمایت قاطعانه» از دولت تاجیکستان است.
پس از تسلط طالبان بر افغانستان، امامعلی رحمان، رئیس جمهور تاجیکستان موضع شدیدی علیه این گروه اتخاذ کرده است؛ گفته می‌شود شماری از رهبران جنبش مقاومت ضد طالبان نیز در دوشنبه، پایتخت این کشور تحت محافظت دولت به سر می‌برند.
برخی رهبران طالبان اخیراً هشدار داده‌اند که تاجیکستان در امور داخلی افغانستان نباید مداخله کند. تاجیکستان نیز به مرز خود با افغانستان نیرو اعزام کرده و می‌گوید طالبان هم نیروهای زیادی در تخار و دیگر مناطق نزدیک به مرزهای این کشور مستقر کرده است.
ماریا زاخاروا، سخنگوی وزارت امور خارجه روسیه در یک کنفرانس خبری گفت روسیه امیدوار است که طالبان به وعده‌های خود در مورد جلوگیری از تهدیدهای امنیتی افغانستان علیه کشورهای دیگر، «زود‌تر از سایر کشورهای همسایه» عمل کند.
به گفته خانم زاخاروا «در صورت لزوم، ما مطابق با اصول اتحاد روسیه و تاجیکستان و مشارکت استراتژیک آنها، همان طور که رهبر روسیه بارها اعلام کرده، قاطعانه عمل خواهیم کرد.»
پایگاه ۲۰۱ نظامی روسیه در تاجیکستان برای حمایت از حکومت این کشور در صورت نیاز برای هرگونه تنش «کاملا مجهز شده است.»
روسیه در دو سال گذشته میزبان چندین نشست بین‌المللی در مورد افغانستان با حضور رهبران طالبان و دیگر چهره‌های مهم سیاسی این کشور بوده است.
