تاجیکستان: سه جنگجوی «انصارالله» در منطقه مرزی با افغانستان کشته شدند
کمیته امنیت ملی تاجیکستان از کشته شدن سه تن از اعضای گروه «انصارالله» که با هدف «ارتکاب اقدامات تروریستی» از افغانستان وارد خاک تاجیکستان شده بودند، خبر داد.
بر اساس بیانیه این کمیته که بامداد چهارشنبه (۱۵ شهریور) منتشر شد، این افراد در شب ۲۹ تا ۳۰ اوت از مرز تاجیکستان در قلمرو روستای کوران شهر درواز عبور کردند.
بر اساس این بیانیه، پس از مشخص شدن محل اختفای این گروهک، عملیات علیه آنها در سه‌شنبه (۱۴ شهریور) انجام شد.
در این بیانیه آمده است: «از این افراد خواسته شد که تسلیم شوند، اما آنها اطاعت نکردند و به سمت نیروهای امنیتی تیراندازی کردند.»
این بیانیه افزود که نیروهای امنیتی تاجیکستان مقدار سلاح و مهمات را نیز از نزد افراد مسلح ضبط کرده‌اند که «از خاک کشور همسایه منتقل» شده بود.
کمیته امنیت ملی تاجیکستان تاکید کرد: « این عملیات تروریستی به طور هدفمند توسط سرویس‌های ویژه طراحی شده است.»
به گفته این کمیته، افراد کشته شده از اعضای سازمان «تروریستی جماعت انصارالله و شهروندان تاجیکستان» بودند.
«گروه انصارالله» یک گروه تروریستی از شهروندان تاجیکستان است که به‌نام طالبان تاجیکستان نیز شناخته می‌شود.
گروه انصارالله به منظور بی‌ثبات‌کردن خاک تاجیکستان، تلاش‌هایی نموده است و این اولین بار نیست. طبق گزارش کمیته امنیت ملی تاجیکستان، در تاریخ ۲۶ اپریل سال جاری، دو عضو این گروه از مرز تاجیکستان و افغانستان عبور کردند و به تاجیکستان وارد شدند تا اقدامات تروریستی را انجام دهند. اما این دو فرد نیز کشته شدند.
قبل از این، کشورهای آسیای میانه، از جمله تاجیکستان، نگرانی‌های خود را درباره حضور گسترده گروه‌های تروریستی در شمال افغانستان بیان کرده‌اند. اما طالبان این نگرانی‌ها را بی‌اساس می‌دانند و می‌گویند که خاک افغانستان برای هیچ کشوری تهدید نمی‌شود.
